Suksesi i suplementeve të vitaminave dhe mineraleve varet nga disa strategji të thjeshta. Në këtë artikull do të mësoni për mënyrat e sakta të përdorimit të vajit të peshkut dhe suplementeve të tjera, që ato të shpalosin plotësisht vlerat e tyre në organizëm.
Vaji i peshkut
Zakonisht vaji i peshkut mund të pihet në çdo orar të ditës. Gjithsesi, mjekët këshillojnë që të pihet pasi keni ngrënë ose gjatë ngrënies së një vakti. Marrja e këtij suplementi me stomak bosh mund të shkaktojë të përziera. Gjithashtu vitaminat yndyrore, siç është edhe vaji i peshkut, përthithen më lehtë nga organizmi nëse shoqërohen me ushqim.
Vitaminat e tjera
Suplementet, me përjashtim të hekurit, duhen marrë gjithmonë gjatë një vakti, sepse nxisin disa procese në stomak që lejojnë përthithjen maksimale edhe të vitaminave dhe mineraleve nga ushqimet.
Suplementet e hekurit duhen marrë në mëngjes me stomakun bosh për përthithje më të mirë. Të gjitha vitaminat e kompleksit B duhen marrë në mëngjes, sepse japin shumë energji. Kjo vlen për shumë vitamina të tjera, por në rastin e magnezit ai duhet marrë në mbrëmje përpara gjumit. Ka raste kur vitaminat dhe mineralet ndërveprojnë keq me disa barna. Për shembull, kalciumi mund të ndërhyjë në përthithjen e barnave për tiroiden, ndaj gjithmonë duhet të konsultoheni me mjekun.
Vitaminat që treten në ujë dhe në yndyrë
Përpara marrjes së suplementeve, sigurohuni të bëni dallimin mes vitaminave që treten në ujë e ato që treten në yndyrë. Vitaminat A, D, E dhe K treten në yndyrë dhe nëse akumulohen gjatë në trup mund të jenë të dëmshme. Këto vitamina duhen marrë në mëngjes nëse pini qumësht, kos ose hani avokado. Vitaminat e kompleksit B dhe vitaminë C treten në ujë dhe dalin nëpërmjet urinës ndaj rreziku i akumulimit të tyre është thuajse zero. Nëse vitaminë merret në formën e kapsulës, organizmi e ka më të vështirë ta tresë dhe ta përthithë. Ndaj është më mirë që disa suplemente të merren në formë të lëngshme.
Kombinimet
Vitaminat D, K dhe kalciumi mund të kombinohen dhe të merren së bashku. Hekuri kombinohet mjaft mirë me vitaminën C sepse kjo e fundit ndihmon në përthithjen maksimale të hekurit. Kalciumi nuk duhet marrë në të njëjtën kohë me hekurin sepse pengon funksionin e tij. Ndaj hekuri duhet marrë në mëngjes dhe kalciumi pasdite. Njeriu duhet të tregojë kujdes edhe me vitaminën C e cila del nga urina dhe të sigurohen të marrin sasi të mjaftueshme të saj. Mënyra më e mirë për të përcaktuar nevojat për suplemente të trupit është të kryeni një analizë gjaku kështu do të keni një ide mjaft të qartë se çfarë suplementesh duhet të merrni. Probiotikët duhen ruajtur në frigorifer. Vaji i peshkut duhet mbajtur në një vend të ftohtë e të errët sepse në të kundërt pilulat nuk do të jenë efikase. E fundit, por jo për nga rëndësia, është që duhet të tregoni kujdes me kafenë. Ajo ndikon në mënyrën e përthithjes së vitaminave dhe minerale dhe nxit urinimin e nëpërmjet tij daljen nga organizmi të suplementeve.
