Ditën e hënë më 17 shkurt , në Bruksel do të zhvillohet “Konferenca e Donatorëve për Shqipërinë”, pas tërmetit tragjik që ndodhi mëngjesin e 26 nëntorit, ku humbën jetën 51 persona, mbetën të plagosur mijëra të tjerë si dhe u shkatërruan qindra shtëpi.
Mësohet se, Konferenca do të hapet nga Presidentja e Komisionit të Evropës, Ursula Von der Leyen, së bashku me kryeministrin shqiptar, Edi Rama, dhe presidentin e Këshillit Europian, Charles Michel, në orën 14:30.
Më pas, do të ketë një prezantim nga komisioneri për Menaxhimin e Krizave në BE, Janez Lenarčič, për reagimin fillestar të emergjencës dhe për vlerësimin e nevojave pas tërmetit.
Ndërkohë, në orën 16:30 do të nisë seanca e donatorëve, e cila do të hapet dhe do të mbyllet nga komisioneri Olivér Várhelyi. Ndërsa në orën 18:45, pritet të ketë një konferencë nga Presidentja e KE, Ursula Von der Leyen, dhe kryeministri Edi Rama.