Mëngjesin e ditës së sotme kryetari i Partisë Demokratike ka përballuar një bisedë të vështirë dhe me tone të larta me ish-kryeministrin Sali Berisha.
Shkaku i sherrit mes tyre ka qenë dhënia nga ana e donatorëve në konferencën e organizuar në Bruksel të shumës prej 1.15 miliardë eurosh, dhuratë dhe kredi të buta për eleminimin e pasojave të tërmetit e rehabilitimin e ekonomisë shqiptare.
Berisha, si “ujk” i vjetër i politikës shqiptare, e ka cilësuar këtë shumë të dhuruar nga konferenca e donatorëve si një “bonus” mbështetjeje politike për Edi Ramën dhe qeverinë e tij.
Fajtor për këtë mbështetje të Komisionit Europian e vendeve donatore, si dhe të organizmave financiarë ndërkombëtarë, Berisha ka cilësuar pikërisht Lulzim Bashën e strategjinë e tij të butë ndaj Edi Ramës, gjatë gjithë ditëve e javëve pas tërmetit.
Burime pranë ish-kryeministrit bëjnë me dije se Berisha ka ngritur tonet ndaj Bashës, duke mos ia falur pushimin e protestave kundër mazhorancës, që sipas tij ka kapur të gjitha institucionet dhe drejtësinë e re.
Madje ish-kreu demokrat i qeverisë i ka kujtuar liderit të PD koston politike që i ka sjellë opozitës me uljen në tryezë me Ramën, kosto që është dyfishuar me 1.15 miliardë eurot e donatorëve, që në perceptimin e shqiptarëve merret si mbështetje e Perëndimit për kryeministrin.
Teksa i ka kërkuar fillimin e protestave, ndoshta në dakordësi të plotë me Metën, thuajse e ka urdhëruar Bashën që të shkojë në takim me Presidentin, dhe të rakordojë qendrimet me të.
“Vizita” e kreut të PD në Presidencë, mbledhja e krerëve të partive aleate e dalja me qendrimin për të startuar lëvizjen radikale kundër Ramës, tregojnë qartë se linja e ashpër e kërkuar nga Berisha-Meta ka prevaluar mbi strategjinë e butë të Lulzim Bashës.
Kreu i PD, tani e tutje pritet të jetë nën diktatin e kësaj dysheje radikale, duke mos çuar as nëpër mend ndonjë pakt të fshehtë me kryeministrin Edi Rama.
Pamfleti
