Ora 05:00 e mëngjesit të sotëm shënoi fundin e ‘shtetrrethimit’, edhe pse qarkullimi i kufizuar mbetet ende në fuqi, si pasojë e masave të ndërmarra nga qeveria për frenimin e e përhapjes së koronavirusit në vend.
Por ndryshe nga hera e parë, ku mediat denoncuan pamje skandaloze, të tregjeve apo shesheve plot, këtë herë, situata duket krejt tjetër, kjo për shkak të ndërgjegjësimit apo të kohës së keqe.
Elbasan/ Në videon e dërguar nga gazetari Fatmir Popja, shihen lëvizje më të pakta në numër si makinave apo të këmbësorëve në rrugë.
Fier/ Në një vëzhgim të gazetarit Ervis Kuçi në rrugët kryesore të qytetit, qarkullimi I automjeteve është I pakët, ndërsa në pikat e kryqëzimit janë të vendosur patrullat e policisë.
Lezhë/ Gjithashtu gazetari Elidon Ndreka ka sjell pamje, ku siç shihet me dhjetëra janë qytetarët që shihen sot në rrugë. Ndryshe nga ditët e kaluara me diell, sot lezhjanët kanë dalë vetëm për te kryer punë të domosdoshme. Deri këtë të hënë, në rrethin e Lezhës janë kryer afro 20 testime dhe te gjitha fatmirësisht kanë rezultuar negative.
Korçë/ Në videon e dërguar nga gazetarja Lorena Kodra qarkullimi duket i pakët, pak makina lëvizin në rrugë, e po ashtu edhe këmbësorë.
Berat/ Sot u gdhi në një qetësi të heshtur dhe në orët e para të mëngjesit u vu re një lëvizje normale. Gazetarja Eneida Petova tha se ata që shihje në rrugë në orët e para të çeljes së shtetërrethimit ishin punonjësit e administratës, marketeve dhe farmacistëve, ndërkohë që qytetarët i filluan lëvizjet e tyre pas orës 09:00 paradites. Pas kësaj ore, rrugët u mbipopulluan dhe u vërejt në çdo aks një lëvizje e madhe e qytetarëve, ndonëse një pjesë e madhe e tyre kishin dalë edhe pa arsye pasi shiheshin duke shëtitur në Pedonalen e qytetit dhe në lulishte.