Ish-kryeministri Sali Berisha është mjaft kritik me menaxhimin që qeveria shqiptare po i bën sot situatës pas përhapjes së pandemisë së koronavirusit.
Sipas tij, mungesa e tamponeve, selektiviteti në dhënie e ndihmës dhe mungesa e transparencës po marrin jetë njerezish. Ndaj, Berisha e ka shpërfaqur gjithë fantazinë duke bërë përgjegjës për këtë situatë “Xhahil Surrelin”, “Sulltan Sallep Surrelin”, “kryeepidemiologun e Surrelit”, “Edvin Kristaq Xhelatin”, etj. Të gjithë këta janë vetëm një njeri: Edi Rama.
Dikur, Berisha mendonte ndryshe. Sipas tij, ka qenë një kohë kur shëndetësia socialiste vendoste rekorde, që vende të tjera të zhvilluara nuk i realizonin dot “me dekada e madje me shekuj”.
“Gazeta Shqiptare” po publikon sot, një artikull interesant të botuar në 9 maj 1984 në gazetën “Zëri i Popullit”, nga pedagogu i Fakultetit të Mjekësisë, Sali Berisha. Artikulli titullohet “Njohja e epidemiologjisë së sëmundjeve, çështje kryesore në shërbimet e specializuara”.
Duhet thënë se, hiq ngarkesën e kuptueshme ideologjike në hyrje dhe në mbyllje, shkrimi flet për problemet e shëndetësisë dhe rëndësinë e mjekësisë preventive.
“Eshtë vënë re plogështi dhe vonesë e pajustifikueshme në drejtimin profilaktik në veprimtarinë e shërbimeve të specializuara. Mjekësia profilaktike mund të parandalojë në masë të konsiderueshme, jo vetëm sëmundje ngjitëse, por edhe shumë e shumë sëmundje të tjera”, shkruan Sali Berisha në artikullin e majit ’84 në “ZP”.
Mes të tjerash, ai e quan arritje dhe sukes “ngritjen e shërbimeve të specializuara të shëndetësisë socialiste, në zbatim të porosive të Pleniumit të 11 të KQ të Partisë të janarit 1971”.
“Gazeta Shqiptare”