Një 28-vjeçar është vënë në prangat e policisë së Durrësit, pasi qarkullonte me armë zjarri pa leje dhe nuk iu bind urdhrave të policisë. Uniformat blu kanë bërë të ditur se gjatë kontrollit atij i është gjetur dhe një sasi lënde narkotike të llojit marijuanë.
Materialet i kaluan Prokurorisë së Rrethit Gjyqësor Durrës, për veprat penale “Prodhimi dhe shitja e narkotikëve” dhe “Armëmbajtja pa leje”, për të cilën parashikohet dënimi me burgim deri në 7 vjet.
“Shërbimet e Komisariatit të Policisë Durrës kanë ndaluar për kontroll në afërsi të muzeumit, mjetin tip “Mercedes Benz”, me drejtues shtetasin K. B. Gjatë kontrollit fizik, këtij shtetasi shërbimet e Policisë i kanë gjetur në brez një armë zjarri pistoletë “TT”, me një karikator me fishekë, si dhe një sasi pres 17.5 gr lëndë narkotike e llojit marijuanë, të cilat u sekuestruan në cilësinë e provës materiale”, thuhet në njoftimin e policisë.
