Kryesore

Takimi në Presidencë me Ruçin, Meta: Rekomandimet e Komisionit të Venecias të vihen menjëherë në zbatim

14:08 - 30.06.20 Gazeta Shqiptare

Pas ftesës për të adresuar rekomandimet e Komisionit të Venecias sa i përket Gjyaktës Kushtetuese, por edhe asaj të lartë, Presidenti i Shqipërisë, Ilir Meta, ka pritur sot në Presidencë kreun e Kuvendit, Gramoz Ruçi.



Meta shprehu gatishmërinë për një interpretim unik të rekomandimeve nga Venecia dhe bashkërendim për zbatim kushtetues.

Sipas njoftimit të Presidencës, u arrit dakordësia që dy institucionet të caktojnë ekspertë për të filluar punën në identifikimin e çështjeve urgjente që kërkojnë zgjidhje.

 

NJOFTIMI NGA PRESIDENCA

Presidenti Meta pret në takim Kryetarin e Kuvendit, Sh.T.Z Gramoz Ruçi

30 qershor 2020

Presidenti i Republikës Sh.T.Z. Ilir Meta zhvilloi sot një takim me Kryetarin e Kuvendit Sh.T.Z. Gramoz Ruçi.

Presidenti Meta theksoi se pas publikimit të Opinionit të Komisionit të Venecias mbi procesin e emërimeve në Gjykatën Kushtetuese, është tejet e rëndësishme që rekomandimet e Komisionit të vihen menjëherë në zbatim.

 

Duke ripërsëritur domosdoshmërinë e bashkëpunimit ndërmjet të gjitha institucioneve me qëllim ripërtëritjen dhe bërjen funksionale sa më parë të Gjykatës Kushtetuese dhe Gjykatës së Lartë, Presidenti Meta shprehu gatishmërinë e Tij të plotë për të nisur menjëherë punën për një interpretim unik të rekomandimeve dhe bashkërendimin për zbatimin kushtetues dhe ligjor të tyre.

Presidenti Meta, theksoi edhe një herë se ky proces tashmë është nën monitorimin jo vetëm të Komisionit të Venecias, por edhe të Bashkimit Europian, Bundestagut gjerman, parlamentit holandez, danez, etj, vlerësimi i të cilëve do të jetë kyç për nisjen e procesit të negociatave të anëtarësimit me Bashkimin Europian. Këtij qëllimi duhet t’i shërbejë bashkëpunimi gjithëpërfshirës edhe për zbatimin e 15 kushteve të BE.

Kryetari Ruçi duke mirëpritur ftesën e Presidentit Meta për këtë takim dhe bashkëndarë të njëjtën pikëpamje mbi nevojën e bashkëpunimit ndërmjet institucioneve, theksoi se e konsideron të papranueshme zvarritjen e ripërtëritjes së Gjykatës Kushtetuese dhe të Gjykatës së Lartë nga institucionet e pavarura.

Kryetari Ruçi, theksoi se, Kuvendi i Shqipërisë në rezolutat e miratuara gjatë raportimeve vjetore të organeve të qeverisjes së sistemtit të drejtësisë (KLGJ KLP), ka vendosur detyrimin e këtyre organeve për të plotësuar sa më shpejt të gjitha vakancat për në Gjykatën e Lartë.

Presidenti Meta dhe Kryetari Ruçi ranë dakord për nisjen e menjëhershme të punës nga ekspertët e të dy institucioneve për identifikimin e të gjitha çështjeve që kërkojnë trajtim urgjent dhe afat-mesëm, dhe dakordësimin e masave që do të duhet në ndërmerren në zbatim të tyre.

 

 

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

This site uses Akismet to reduce spam. Learn how your comment data is processed.

CLOSE
CLOSE