Në një kohë që në mbarë botën janë infektuar mbi 10 milionë njerëz nga koronavirusi dhe kanë vdekur mbi 500 mijë të tjerë ende nuk është prodhuar një vaksinë kundër Covid-19. Megjithatë mediat e huaja kanë shkruar se trajtimi me ilaçin “Remdesivir” kundër koronavirusit do të kushtojë përafërsisht 3,120 dollarë për të gjithë ato pacientë që janë me sigurim vullnetar në Shtetet e Bashkuara të Amerikës.
Ky ilaç i prodhuar nga kompania farmaceutike Gilead-it është aktualisht ilaçi i parë që është aprovuar për t’u përdorur për shërimin e koronavirusit në Shtetet e Bashkuara nga FDA (Administrata e Ushqimit dhe Barnave), në datën 26 qershor.
Deri më sot kompania prodhuese e ka shpërndarë falas ilaçin, por nga dita e nesërme, data 1 korrik, Remdesivir do të shitet mbi 3.000 dollarë.
Ndërkohë Agjencia Evropiane e Barnave, EMA e ka miratuar atë për trajtimin e pacientëve të prekur nga infeksioni i Covid-19, për fëmijët mbi 12 vjeç dhe për të rriturit e infektuar që kanë probleme dhe shumë vështirësi në frymëmarrje ose ata që kanë nevojë për respiratorë.
