Opinion-Komente

Turneu hipokrit i Ramës në Prishtinë

14:42 - 01.07.20 Andi Bushati

Edi Rama ka përmbyllur me turneun e Prishtinës paradën e dyshimeve që po ngre prej një jave për efikasitetin, ndershmërinë dhe paanësinë e drejtësisë ndërkombëtare. Duke artikuluar sot pikëpyetje për efikasitetin e saj në rastet e Haradinajt apo Limajt, duke luajtur rolin e vëllait që jeton në shtëpi tjetër, por që ka vënë re “diçka të rëndë dhe të padrejtë”, duke denoncuar njoftimin e Gjykatës Speciale si fletërrufe të ngjashme me ato të revolucionit kulturor, kryeministri shqiptar ka furnizuar me barut të gjitha armatimet që godasin mundësinë e marrjes së Hashim Thaçit apo Kadri Veselit si të pandehur. Deri këtu nuk kemi të bëjmë me ndonjë mëkat. Çdo mendje e ftohtë e shikon me dyshim njoftimin e Hagës të bërë tri ditë përpara samitit që do të zhvillohej në Shtëpinë e Bardhë, çdokush mund të ketë të drejtë të vëzhgojë pas tij një prapavijë politike, secili është i lirë të ngrejë dyshime për pavarësinë e një tribunali të votuar me këmbënguljen e viktimave të tij të mundshme. Pra, deri këtu Rama mund të jetë ‘OK’. Edhe si qytetar, edhe si kryeministër i një vendi, askush nuk mund t’ia mohojë atij aludimet për “një drejtësi të stërzgjatur, që nuk është më drejtësi”, për një sistem të pakudondodhur në botë, që po gjykon ish- komandantët “me gjashtë shkallë”, për dështimin me radhë të gjykatave të OKB-së, Euleksit, atyre vendëse me mbikëqyrje të huaj etj.. Por, në përfundim të gjithë kësaj fushate, pasi ke dëgjuar të gjitha këto akuza të Edi Ramës për drejtësinë që i ka lënë fëmijët pre të ankthit, nëse i kanë baballarët heronj apo kriminelë, ke të drejtë të ngresh një pyetje: A mund të provohet e gabueshme, e padrejtë, e pandershme, asimetrike dhe e manipuluar një arkitekturë drejtësie e ngritur nga ndërkombëtarët? A mund të rezultojë dështim një eksperiment “sui generis” i implantuar në një demokraci foshnjore si Kosova? Natyrisht, kryeministri shqiptar bën mirë që na fton të ushtrohemi në këto dilema në rastin e Kosovës. Por ky, Rama i Prishtinës, është tejet hipokrit kur e krahasojmë me alter egon e tij të Tiranës. Këtej nga anët tona, që prej vitit 2015, ai anatemon çdokënd që shpreh rezerva apo ngre dyshime për drejtësinë që po vënë në zbatim ndërkombëtarët. I njëjti njeri, që deklaron publikisht se firmos në letër të bardhë mbi çdo draft me të cilin bien dakord të huajt, që etiketon si të frikësuar nga burgu cilindo që s’pajtohet me asimetrinë e vendimeve të vetingut, që përqesh të gjithë ata që revoltohen për emërimet skandaloze në drejtësinë e re, nuk mund të ketë dy standarde kaq kundërthënëse. Natyrisht, pavarësisht qëllimeve të mbrapshta që ka për t’i dalë në mbrojtje Thaçit, ndonëse po bën përpjekjen e fundit për të mbajtur në këmbë planin e përbashkët me Vuçiçin, duhet thënë se qasja dyshuese e Ramës ndaj drejtësisë që bëjnë ndërkombëtarët, në këtë rast është më e drejtë. Ajo rrëzon njëherë e mirë mitin e ngritur gjatë kohës së qeverisjes së tij se reforma jonë në drejtësi është e përkryer, vetëm se e kanë dizenjuar dhe implantuar disa zyrtarë perëndimorë. Pra, në fund të turneut të tij hipokrit në Prishtinë, pa marrë parasysh qëllimet reale që pati, duke lënë mënjanë interesat e veta politike të momentit, duhet thënë se Rama na e bëri një të mirë: ai filloi rrënimin e një bestydnie që e ka kultivuar vetë, asaj të një drejtësie që duhet t’i bindemi kokulur, sa herë që ajo ka vulën e ndërkombëtarëve. Ai na ftoi të rinisim të arsyetojmë me mendje të hapur, rast pas rasti dhe jo nën diktatin e pranimit të gjithçkaje, pasi për të kanë dhënë bekimin të huajt.



 

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

This site uses Akismet to reduce spam. Learn how your comment data is processed.

CLOSE
CLOSE