Një shtetas gjerman është gjetur i vdekur në rrethana ende të panjohura, në oborrin e një hoteli në Mitrovicë. Thomas Kortendiek, 39-vjeç, kishte kohë që jetonte në Kosovë, duke punuar për një kompani që merrej me projektin e energjisë me erë, që po zhvillohet në Bajgorë të Mitrovicës.
Vdekja e gjermanit nga Haselund është konfirmuar sot për IndeksOnline edhe nga zyrtarët policor në Rajonin e Mitrovicës.
“Një person, shtetas i huaji, ka humbur jetën. Rasti është duke u hetuar si vdekje e dyshimtë, ndërsa trupi i viktimës është dërguar në Departamentin e Mjekësisë Ligjore për obduksion”, ka deklaruar Avni Zahiti, zëdhënës i policisë në Mitrovicë.
Ai ka thënë se dyshimet fillestare janë se 39-vjeçari është hedhur nga dritarja e hotelit ku po qëndronte.
