Mjeku Bassam Osman nga Bejruti ka rrëfyer shqetësimin dhe frikën e trajtimit të disa prej të plagosurve nga shpërthimi masiv që u ndodhi pak ditë më parë. Ai tregoi për “Daily Mail” mënyrën se si u kujdes për qindra pacientë për 52-orë në një spital, gjithashtu i dëmtuar gjatë shpërthimit.
Ai e përshkroi vendin si një kaos, ku tavanet dhe dritaret e spitalit ishin shkatërruar, shihje kudo njerëz të plagosur e të gjakosur, që ulërinin nga dhimbjet. Vetëm 10 minuta mbas shpërthimit spitali u mbush plot, tregon mjeku mes të tjerash.
“Duhej të improvizonim, duhej të bënim më të mirën tonë duke llogaritur edhe stafin e spitalit që kishim.”
Banorët, studentët, infermierët, nëpunësit, dhe stafi i spitalit u mblodhën për të ofruar ndihmë.
“Ky ishte një moment në të cilin e ndjeva veten me fat se i kisha të gjithë pranë”,- thotë ai.
