Kryeministri Edi Rama iu është drejtuar sërish me një mesazh naftëtareve të Ballshit, të cilat pohuan se nuk do të dalin nga greva e urisë nëse nuk i plotësohen kërkesat.
Me anë të një postimi në ‘Twitter’ Rama shkruan se qeveria nuk negocion nën presion dhe nuk pranon ultimatume nga askush, teksa iu bëri thirrje që të ndalin grevën dhe të ulen në një tryezë për dialog.
REAGIMI I RAMËS
Të dashura greviste të Ballshit, është e drejta juaj të mos dilni nga greva, por është e pamundur të ulemi bashkë me presione e ultimatume! Jam gati të vij tek ju sapo të mbyllni grevën e të flasim si do mundemi t’ju ndihmojmë për këtë hall që nuk e ka krijuar qeveria.
Ne po punojmë për të gjetur investitorë seriozë që të rindezin rafinerinë edhe pse greva juaj nuk ndihmon as për këtë! Ndërsa për ndihmën e mundshme shtetërore ndërkohë, meqë ju s’pranoni as të dilni në asistencë, ka vetëm një rrugë: Mbyllni grevën dhe ulemi qajmë hallin!