Detaje të reja dalin në dritë nga shpërthimi me lëndë plasëse në portën hyrëse të banesës së shtetasit Tahsim Xheladin Banushaj, në Vlorë.
Ndërsa 69-vjeçari deklaroi të mos kishte konflikte me askënd, pistat ku policia po heton janë dy.Burimet bëjnë me dije se shkak për vendosjen e tritolit mund të jetë puna që bën një prej familjarëve të Banushaj, pasi dyshohet se një prej familjarëve të tij, të jetë bashkepunëtor i SHISH.
Por nuk mbetet pas as pista e ndonjë konflikti të mundshëm që kanë pasur jashtë shtetit fëmijët e tij.
Vetë Banushaj deklaroi pak pas ngjarjes se mendoi që ishte tërmet kur dëgjoi shpërthimin. “Unë e ndjeva që kur ia bëri bam, u trembëm burrë e grua këtu se fëmijët i kemi të shpërndarë. I them gruas tërmet! Dalim përjashta, s’kishte as tërmet, asgjë. Shikojmë ku ndodhi, dalin edhe gjitonët e shikojmë ku ndodhi. Mendova mos ia kanë vendosur gjitonit e kur e shoh derën këtu e kuptoj e i kthehem gruas i them: Grua qenka dasma jonë”,- shprehet Banushaj.