Shkurtimi i orëve të mësimit nga 45 në 30 minuta, për shkak të masave që janë marrë nga qeveria për të kufizuar përhapjen e koronavirusit, duket se po kthehet në një problem të madh për prindërit. Prej 2 ditësh prindërit e nxënësve të shkollës “Emin Duraku” po nënshkruajnë një peticion, ku do i kërkojnë Ministrisë së Arsimit kthimin e orëve mësimore të plota.
Mbledhja e firmave do të vazhdojë edhe disa ditë dhe në rast se nuk marrin përgjigje prindërit paralajmërojnë ndërprerjen e mësimit dhe protesta. Situata në shkollën ‘Emin Duraku’ është më e rënduar se te shkollat e tjera për shkak të fluksit të madh të nxënësve por edhe sepse një pjesë e godinës është jashtë funksionit për shkak të dëmtimeve nga tërmeti i 26 nëntorit.
Viti i ri shkollor nisi më datë 27 shtator, ndërsa që prej datës 1 shtator nxënësit kanë zhvilluar mësim plotësues për të plotësuar mangësitë e mbetura nga një vit më parë prej pandemisë.
