Situata ekonomike, sidomos e shtresave në nevojë, është përkeqësuar ndjeshëm, pasi rritja e ndjeshme e çmimeve të produkteve të shportës dhe karburanteve i ka pakësuar në maksimum shpenzimet familjare.
Kriza e thellë që po kalojnë shumë familje reflektohet direkt në marketet e lagjeve, ku pronarët e tyre po shkojnë drejt falimentimit për shkak të uljes së ndjeshme të xhiros dhe akumulimit të borxheve të papaguara nga klientët.
Shumë nga pronarët e bizneseve të vogla në zonën e Arapajt, Durrës, ankohen për mungesën e të ardhurave, sepse rënia e fuqisë blerëse dhe largimi masiv i banorëve të periferive jashtë vendit e ka bërë thuajse të pamundur për ta mbajtjen hapur të biznesit.
Listat e gjata të borxheve janë të pranishme në secilin biznes, ndërkohë që pohojnë se klientët blejnë vetëm produktet esenciale. Për shumë nga klientët, frutat janë bërë “mollë” e ndaluar.
