Detaje te reja kanë dalë në dritë më lidhje me ngjarjen që fatmirësisht nuk përfundoi në tragjedi pasditen e kësaj të marte në Shkodër.
Gazeta Shqiptare ka siguruar foton e lëndës plasëse të vendosur poshtë mjetit tip “Range Rover” të drejtoreshës së operatorit të kujdesit shëndetësor në Shkodër, Suida Kuka.
Siç duket edhe në pamjen e siguruar, pakoja me eksploziv është vendosur poshtë gomës së automjetit luksoz.
Më herët, në njoftimin e dytë të lidhur me ngjarjen, burimet zyrtare bënë me dije se në pakon e dyshimtë kishte vërtet lëndë plasëse, por është shpërthyer në mënyrë të kontrolluar nga njësia antieksploziv e RENEA-s.
Ndërkaq, grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, vijon veprimet për zbardhjen e rrethanave të ngjarjes, identifikimin dhe kapjen e autorit.
Njoftimi i policisë:
Shkodër/Informacion shtesë
Në vijim të informacionit paraprak për një pako të dyshimtë që u konstatua në lagjen “Vojo Kushi”, Shkodër, në afërsi të një mjeti “Range Rover”, në pronësi të shtetases S. K., banuese në fshatin Demiraj, Malësi e Madhe, me detyrë Drejtoreshë e Drejtorisë së Shëndetit Publik Shkodër, ju informojmë se:
Në vendin ku u konstatua pakoja e mbyllur erdhi njësia antieksploziv e RENEA-s, e cila bëri shpërthim të kontrolluar të pakos, brenda së cilës rezultoi se kishte lëndë eksplozive.
Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, vijon veprimet për zbardhjen e rrethanave të ngjarjes, identifikimin dhe kapjen e autorit.