Kjo që shikoni në foton më poshtë është makina me të cilën dyshohet se lëviznin autorët e atentatit mafioz të ndodhur pak javë më parë në mbikalimin e Fushë-Krujës ku u ekzekutuan 22-vjeçari Brilant Martinaj dhe dy miqtë e tij, Besmir Hoxha dhe Diklen Vata.
Sipas të dhënave të publikuara nga ABC, mjeti dyshohet se ka hyrë në Shqipëri nga Kosova përmes pikës kufitare të Morinës dhe ditën e atentatit pasi është përdorur nga 4 atentatorët për të ekzekutuar objektivin, është djegur në fshatin Larushk.
Automjetit i është fshirë numri i sasisë nga ana e grupit kriminal që planifikoi vrasjen mafioze duke vështirësuar punën e grupit hetimor për të zbuluar pronarin e tij.
Atij i ishin vendosur targat “AA 156 OR” që i përkasin një makine tip “Daimler Chrysler” në emër të shtetasit me inicialet, A.L. Targat rezultojnë të denoncuara si të vjedhura në policinë e Tiranës gati 1 vit më parë.