Sinoptikania Lajda Porja ka informuar për kushtet meteorologjike në vendin tonë dy ditët e fundit dhe në vijim. Ajo tha në një lidhje me ‘News24’ se ka pasur një ndërprerje të reshjeve në një pjesë të mirë të territorit, sidomos në zonat qendrore dhe pjesërisht në veri, ndërkohë ende vijojnë reshjet në jug të vendit pas një situatë alarmante të mbrëmjes së kaluar ku reshjet kanë qenë të konsiderueshme, pothuajse në të gjithë territorin pasi në veri kanë rënë mbi 120 mm shi.
Ka rënë sasia mujore vetëm gjatë ditës dhe natës së mbrëmshme. Pritet të kemi fuqizim të vranësirave pasdite, ku sërish veriu dhe qendra do të jenë zonat të cilat do të marrin dhe më shumë reshje, madje ne do të bëjmë një analizë për sa i përket ditës së nesërme për të parë se sa tejkalohet norma mujore në shumë qytete të Shqipërisë. Parashikohet që vetëm në orët e vona të mbrëmjes të kemi dobësim të situatës së reshjeve, duke bërë që nesër reshjet të mbeten prezentë, por në sasi të pakta, jo më shumë se 10-13 mm shi dhe kryesisht veriu dhe qendra.
Ky episod që ka nisur nga dje dhe pritet të përfundojë jo nesër, pasi kemi sërish të shtunën dhe të dielën një fuqizim të reshjeve, duke e bërë shtatorin një muaj shumë të lagësht. Madje në shumë zona është tejkaluar norma mujore. Ka rënë sa dyfishi, sidomos në zonën e Shkodrës, Mbishkodrës, Tropoja, Kukësi dhe gjithë zona e veriut ka marrë një sasi të konsiderueshme të reshjeve.
Nuk janë problematike temperaturat. Temperaturat e ajrit janë relativisht të larta, janë tipike të shtatorit, ku maksimalja shkon 25-26 gradë. Pritet një rritje e lehtë nga nesër e në vijim, mbeten në kuotat e 27 gradëve, temperatura tipike të shtatorit. Stuhitë e erës do jenë prezentë dhe gjatë natës, ku sërish problematike situata mbetet në brigjet e Jonit, ku shpejtësia e erës është dhe 60 apo mbi 60 km/orë duke sjellë një det të trazuar. Ka një përmirësim të parametrit të erës duke filluar që nga pasditja e së mërkurës e deri në fund të javës.
