Në të gjithë vendin tonë, vijonë nën ndikimin e alternimeve të kthjellimeve dhe vranësirave të shpeshta. Më të dukshme vranësirat paraqiten në zonat Jugore.
Herë pas here vranësirat do të pësojnë zhvillim duke krijuar mundësi për reshje të pakta dhe izoluara, më të dukshme në zonat Juglindore dhe ekstremin Jugor.
Temperaturat e ajrit do të rriten në mëngjes dhe në mesditë duke luhatur vlerat ditore nga 1°C deri në 17°C. Era do të fryjë e lehtë dhe mesatare me shpejtësi 28 km/h nga drejtimi Lindor duke krijuar në brigjet detare dallgëzim 1 – 2 ballë, sipas Meteoalb.
Kosova
Republika e Kosovës do të jetë nën ndikimin e kushteve të qëndrueshme atmosferike, duke sjellë alternime kthjellimesh dhe vranësirash. Më të dukshme vranësirat do të jenë në zonat Lindore, por nuk do të mund të sjellin reshje në territor.
Maqedonia e Veriut
Masat ajrore të qëndrueshme do të jenë mbizotëruese në të gjithë territorin e Maqedonisë së Veriut, ku pritet të ketë alternime kthjellimesh dhe vranësirash në të gjithë vendin. Parashikohet që herë pas herë të ketë shtim gradual të vranësirave, të cilat nuk do të mund të sjellin reshje.
Rajoni dhe Europa
Europa Lindore dhe Qendra e kontinentit do të jenë në dominimin e kushteve të qëndrueshme atmosferike, të cilat do sjellin kthjellime dhe kalime vranësirash. Ndërsa pjesërisht Europa Jugore do të jetë nën ndikimin e vranësirave të shpeshta dhe reshjeve të shiut. Po ashtu me vranësira dhe reshje dëbore mbeten Vendet Nordike.
