Gjykata ka ndryshuar masën e sigurisë për ish-sekretarin e përgjithshëm të Ministrisë së Financave Arlind Gjokutaj, i akuzuar se i shkaktoi dëm 1.2 mln euro shtetit.
Arlind Gjokutaj ishte në masën e sigurisë “arrest shtëpie” dhe togat e zeza e kanë ndryshuar në detyrim paraqitje.
Ndërsa për ish-zyrtarët e tjerë të Ministrisë së Financave, Fatmir Hoxhaj dhe Alban Ruli, u la në fuqi masa “arrest shtëpie”.
Të tre këta persona dyshohet se i kanë shkaktuar shtetit një dëm prej 1.2 milionë eurosh.
Fatmir Hoxhaj mbante postin e drejtorit juridik në Ministrinë e Financave, ndërsa Alban Ruli ishte përmbarues. Ata dyshohet se janë përfshirë në një skemë abuzimi që dyshohet se i ka shkaktuar shtetit një dëm prej 1.2 mln eurosh.
Ata akuzohen se kanë firmosur dokumentet që kjo shumë t’i kalonte Ilir Thanës, në cilësinë e një ish pronari ndërkohë që ai nuk e kishte një status të tillë.
Ilir Thana kishte marrë fillimisht një shumë prej 400 mijë eurosh ndërkohë që pjesa tjetër pritej t’i transferohej në muajt në vazhdim.
