Deputeti demokrat, Luan Baçi është shprehur se “ka zero shanse” që Lulzim Basha të kthehet në krye të PD-së.
Në një intervistë për Panorama TV, ai u shpreh se Basha nuk është larguar nga arena politike, por bëri një vit pushim.
“Basha del sa herë i thotë Rama dil, kur i thotë Rama tërhiqu, ai tërhiqet”, tha Baçi duke shtuar se “rikthimi i tij tregoi që ishte një lojë e pistë”.
I pyetur nëse mund të ketë një përballje mes Berishës e Bashës për drejtimin e partisë, ai u shpreh: “S’ka si të ketë, ai dëshiron të kandidojë tek ajo PD-ja që kanë mbetur pak veta. Të kalojë tek PD e vërtetë.”
Luan Baçi: Nuk është kthyer Basha në arenën politike, aty kanë qenë por bëri një vit pushim. Ata që nuk e kuptojnë apo nuk duan ta kuptojnë lojën e Bashës ose Ramës. Basha del sa herë i thotë Rama dil, kur i thotë Rama tërhiqu, ai tërhiqet.
U tërhoq një periudhë kohe kur e pa që gjithë demokratët dhe shumë qytetarë nuk panë më tek ai një lider por një pazarexhi që punonte për hesapet e veta financiare dhe të familjes së vet. E pa që humbi mbështetjen, nuk mund të qëndronte më. Ajo loja ‘bëj një hap pas’ për hatër të demokratëve, do ishte e vlerësuar nëse do ishte e vazhdueshme. Rikthimi i tij tregoi që ishte një lojë e pistë që thjesht për të tërhequr vëmendjen e demokratëve.
A ka shanse të rikthehet në krye të PD-së?
Luan Baçi: Ka shanse 0 që të rikthehet, sepse demokratët e njohën. Do të doja të garonte, që ta shikonte sa e duan. Kryetari i PD-së është Berisha, pas zgjedhjeve kalon në votëbesim. Nëse nuk merr votëbesim, kalon në zgjedhje.
Të drejtën për të hyrë në garë e ka kushdo.
S’ka si të ketë përballje, ai dëshiron të kandidojë tek ajo PD-ja që kanë mbetur pak veta. Të kalojë tek PD e vërtetë. Statuti do të zbatohet, Berisha ka thënë që do ketë votëbesim.
PD është një e vetme, pavarësisht një artifice që e mban këtë parti të përçarë. Vula mbahet në shkallët e gjykatës, ata që mendojnë se janë PD po përdorim vulën dhe me këtë abuzojnë, siç e përdorën në zgjedhjet e 14 Majit.
Do të doja që kjo situatë të mos zgjaste., Nuk ka se çfarë gjykata të vendosë, këtë e vendos partia se kush është drejtuesi.
Protestat janë shumë të domosdoshme. Duhet të dalim në protesta sepse vetëm kështu mund të ndalet kjo qeveri.
