Policia ka dërguar në prokurori materialet e para për djegien e pallatit 10-katësh që u përfshi nga zjarri 6 ditë më parë, në zonën e 21 Dhjetorit në Tiranë.
Sipas raportimeve nga gazetari Igli Çelmeta për BalkanWeb, mësohet se ende po hetohet çështja nëse janë zbatuar standardet e ndërtimit, veçanërisht për ndërtimin e fasadës dhe materialit të përdorur.
Po ashtu dy ditë më parë ndërtuesi i pallatit ka dërguar skelat për të ndërhyrë në pallat, por nuk është lejuar nga banorët dhe policia. Ndërkohë, bashkia sot në orën 18:00 ka kërkuar takim me banorët e pallatit për të zgjidhur problemin e strehimit.
Kujtojmë se nga raportimet dyshohet se flakët nisën në katin e fundit të pallatit dhe i favorizuar nga era dhe materiali polesterol me të cilën ishte e përbërë fasada e pallatit, zjarri është përhapur me shpejtësi në të gjithë pallatin.
Siç duket edhe nga pamjet, kati i fundit i pallatit është djegur plotësisht, si dhe kati i pestë, ndërsa disa apartamente kanë pësuar dëme të shumta materiale.
