Shtetet e Bashkuara të Amerikës i kanë bërë presion Gjermanisë se do të kufizojë ndarjen e informacioneve sekrete me Berlinin, nëse lejon Huawei të marrë pjesë në rrjetin e saj 5G.
Paralajmërimi erdhi përmes një letre që ambasadori amerikan në Gjermani, Richard Grenell, i dërgoi ministrit gjerman të Ekonomisë.
Sipas “Wall Street Journal”, Grenell shkruante në letër se sistemet e sigurta të komunikimit janë thelbësore për bashkëpunimin në fushën e mbrojtjes dhe inteligjencës, dhe se firmat si Huawei mund e cënojnë atë.
Paralajmërimi shënon një përshkallëzim në përpjekjet e administratës Trump për të bindur aleatët që të bojkotojnë gjigantin e teknologjisë kineze.
SHBA-të, Australia dhe Zelanda e Re kanë bllokuar të gjitha firmat lokale nga përdorimi i pajisjeve Huawei për të siguruar teknologjinë për rrjetet e tyre 5G.
Huawei ka nisur një strategji më agresive në muajt e fundit për të kundërshtuar atë që e konsideron si një fushatë amerikane të “ndotur”.
Javën e kaluar, ajo paraqiti një padi kundër qeverisë amerikane mbi një ndalim që kufizon agjencitë federale nga përdorimi i produkteve të saj, duke argumentuar se është “jokushtetuese”.
Huawei gjithashtu ka publikuar reklama në shtypin e huaj dhe ka ftuar gazetarë të huaj për të vizituar kampuset e saj.
