Shtypi grek vijon të trajtojë ngjarjen e rëndë të vrasjes së 20-vjeçares Caroline në Greqi nga burri i saj pilot, Babis Anagnostopoulos, 32 vjeç. Në televizionin SKAI të Athinës ka folur një e afërme e nënës së Caroline, e cila ka treguar se si ka reaguar mamaja e viktimës, kur mësoi se personi që i vrau vajzën është pikërisht dhëndri.
“Suzana (nëna e 20-vjeçares) është shumë e zemëruar. Është e mbushur me zemërim dhe me shumë pikëpyetje në mendje. Ajo i mbante të gjitha shpresat tek Babis (dhëndri), e shikonte atë si vazhdimin e vajzës së saj. Ajo nuk e kishte idenë, nuk kishte dyshuar kurrë tek Babis. Ishte shumë e lumtur për të dy, saqë gjithmonë thoshte mos na ndodhë ndonjë gjë e keqe kaq të lumtur sa janë”.
Vetë nëna e Caroline ka thënë se ajo nuk kishte vënë re ndonjë problem në marrëdhëniet e çiftit.
“Unë jam nëna e Caroline që u vra disa ditë më parë në shtëpinë në Glyka Nera. Ende nuk mund ta besoj atë që ka ndodhur. Caroline ishte një fëmijë shumë e mirë, një studente e shkëlqyer dhe merrte pjesë në të gjitha aktivitetet. Unë dhe Babis u takuam në Alonissos, kur ai ishte rreth 16 vjeç. Ata ishin takuar në një shoqëri të përbashkët. Ne e dinim për marrëdhënien e tyre, dhe ndonëse Caroline ishte pak e re, pamë që ata ishin të dashuruar dhe ne i mbështetëm fëmijët. 11 muaj më parë ajo lindi një vajzë, Lydia. Që atëherë e shihja çdo ditë shumë të lumtur dhe ajo më tha se po kalon shumë mirë.
Ajo kurrë nuk u ankua tek unë se ishte e lodhur ose se kishte probleme. Ne flisnim në telefon çdo ditë me video dhe unë mund të shihja se ata ishin vërtet mirë. Për herë të fundit biseduam në telefon të hënën në mbrëmje. Ajo nuk dukej se ishte e shqetësuar. Ne thamë ‘natën e mirë’ dhe e mbyllëm telefonin. Të nesërmen në mëngjes isha në shtëpinë time në Alonissos, kur disa nga miqtë e mi erdhën dhe më treguan për të keqen që ndodhi. Unë gjithashtu bëra disa telefonata dhe u sigurova për të keqen. Unë nuk e di se çfarë ka ndodhur brenda shtëpisë dhe as nuk dua të di pse dhemb kaq shumë. Falë Zotit Lydia është mirë”.
Nga ana tjetër, ka folur edhe një shok i Babis, për të zbuluar më shumë rreth karakterit të 32-vjeçarit. Gjëja që ka shokuar opinionin publik, është fakti se pas vrasjes, ai kishte sajuar historinë e një grabitje me fund tragjik.
“Ju është dukur i ftohtë, sepse kështu ishte edhe si njeri. Gjithmonë ishte i buzëqeshur, nuk ishte i zemëruar, por nuk shfaqte emocione të forta, as gëzim dhe as trishtim, nuk ofendonte të tjerët. Ishte aq i dashuruar saqë vinte në ishull për 1 orë vetëm për t’i sjellë Karolinës një buqetë me lule”, tha ai.
Miq të familjes së pilotit kanë thënë ndër të tjera se vëllai i 32-vjeçarit është i shokuar nga e gjithë ngjarja.
“Vëllai i tij është në shok, është akoma në ishullin Alonissos. Kush i njeh prindërit e tij e di që janë shenjtorë, janë të shkolluar, nuk e di se si do ta menaxhojnë gjithë këtë situatë”, tha një i njohur i familjes.
