Është java e derbit të kryeqytetit, Tirana-Partizani, pa diskutim sfida më e rëndësishme e futbollit shqiptar. E gjithë vëmendja është postuar në “Air Albania”, aty ku të hënën do të përballen rivalët e përjetshëm.
Për të diskutuar mbi këtë përballje epike, i ftuari special në “Sport News”, në “News24”, ishte drejtori sportiv i Tiranës, Tefik Osmani, një personazh i veçantë i cili e ka përjetuar derbin me të dy ekipet dhe në çdo formë, së fundmi si drejtor sportiv.
Në intervistën e tij dhënë për moderatoren Enxhi Biba, Osmani u ndal në shumë tema, a do të zhvillohet ky derbi me kapacitet të plotë, çfarë ka Tirana më shumë se Partizani, apo prapaskena nga merkato e transferimeve. Drejtori foli për marrëdhënien e tij me familjen Halili dhe për projektin e madh që pritet ti jap Tiranës dhe akademisë bardheblu një tjetër dimension.