Një nga oficerët e sigurisë, i renditur në sigurinë e kryeministrit të Mbretërisë së Bashkuar, Rishi Sunak është arrestuar dhe pezulluar nga detyra ditën e hënë (17 qershor), pasi dyshohet të ketë qenë i përfshirë në baste përgjatë kohës së zgjedhjeve të përgjithshme në shtetin ishullor.
Policia Metropolitane, ka raportuar se ishte kontaktuar nga komisioni mbikëqyrës i lojërave të fatit të premten e kaluar në lidhje me një hetim mbi baste të dyshuara të vëna nga një efektiv policie nga Komanda e saj e Mbrojtjes së Mbretërisë dhe Specialistëve, e cila siguron mbrojtjen e ngushtë të liderit britanik.
Bastet mësohet se ishin të lidhura me kohën e zgjedhjeve të përgjithshme, raporton BBC.
Sipas Policisë Metropolitane, kjo e fundit e ka referuar menjëherë çështjen në zyrën e saj të standardeve e se oficeri është hequr nga detyrat operacionale. Gjithashtu është informuar për këtë çështje dhe Zyra e Pavarur për Sjelljen Policore.
Oficeri është arrestuar ditën e hënë, më 17 qershor, nën dyshimin e sjelljes së pahijshme në detyrë publike. Fillimisht u vendos në paraburgim por u lirua me kusht në pritje të hetimeve të mëtejshme nga autoritetet.
“Komisioni i lojërave të fatit vazhdon të udhëheqë hetimin për shkeljet e supozuara të basteve dhe hetimi ynë po ecën paralelisht me këtë”, u shpreh Policia Metropolitane në një deklaratë
Një zëdhënës i Komisionit të Lojërave të Fatit tha në deklaratën e tij se “po heton mundësinë e shkeljeve në lidhje me datën e zgjedhjeve”.
“Ky është një hetim në vazhdim dhe komisioni nuk mund të japë detaje të mëtejshme në këtë moment.”
Lajmi vjen një javë pas zbulimit të Guardian se ndihmësi më i afërt parlamentar i Rishi Sunak, Craig Ëilliams, vendosi një bast 100 £ në zgjedhjet e korrikut vetëm tre ditë përpara se kryeministri të caktonte datën.
Si rezultat i atij incidenti, Komisioni i Lojërave të Fatit bëri një hetim më të gjerë dhe gjeti informacione që çuan në vendimin për të hetuar oficerin.