Biznesmeni i njohur nga Saranda, Timoleon Babi, i njohur shkurt si “Timo”, ka përfunduar dje në pranga, pasi ka kundërshtuar me armë forcat e policisë. Ish-pronari i diskos së famshme verore “Africa”, aktualisht pronar i hotel “Panorama” dhe disa bizneseve të tjera në qytetin bregdetar, akuzohet për pesë vepra të ndryshme penale pas përplasjes me blutë. Ngjarja për të cilën akuzohet 50-vjeçari ka ndodhur pasditen e së premtes në afërsi të hotelit të tij. Mësohet se
Policia Bashkiake e Sarandës kishte marrë informacion se 50-vjeçari kishte pushtuar një sipërfaqe të konsiderueshme toke në afërsi të hotelit të tij në lagjen nr.1 të këtij qyteti, ndaj ka shkuar aty për sqarimin e situatës dhe verifikim e rastit. Por, Babi ka kundërshtuar efektivët e bashkisë, të cilët kanë kërkuar ndihmën e sallës operative të Komisariatit të Sarandës. Në momentin kur forcat e rendit kanë
mbërritur në vendin e ngjarjes, 50-vjeçari është larguar duke qëlluar në ajër me armë zjarri. Menjëherë ka nisur ndjekja e tij, ku brenda pak minutash është bërë e mundur kapja dhe ndalimi i biznesmenit. Ndërsa, nuk i është gjetur arma, të cilën pohohet se ai e kishte fshehur. Nga kontrolli personal, Timoleon Babit i është gjetur dhe sekuestruar një sasi prej 13 gr lëndë narkotike e llojit kanabis sativa. Materialet në ngarkim të tij u referuan në Prokurorinë e Sarandës për veprat penale: “Pushtimi i tokës”, “Kundërshtimi i punonjësit të policisë së rendit publik”, “Prishja e qetësisë publike”, “Prodhimi dhe mbajtja pa leje e armëve luftarake dhe municionit” dhe “Prodhimi dhe shitja e narkotikëve”.
BIZNESMENI
Burime zyrtare nga policia e Sarandës pohuan se biznesmeni Timoleon Babi është person me precedentë penalë. Mësohet se prej kohësh, 50-vjeçari është në konflikt me të afërt të të shumëkërkuarit Klement Balili, lidhur me pronësinë e “Factory Club” në Sarandë, e cila është ndërtuar në tokën e Babit. Para disa kohësh kjo çështje u bë mediatike, pasi Timoleon Babi vuri në dispozicion të medias një video ku pjesëtarë të familjes Balili dukeshin teksa shqyenin me mjete të forta portën e klubit të natës. Ndërkohë që këta të fundit u justifikuan se u detyruan ta kryenin atë veprim, pasi u kishte humbur çelësi i portës së jashtme. Timoleon Babi ka precedentë penalë, por njihet edhe si bamirës. Më parë ai ka dhuruar pajisje elektronike për paraburgimin e Sarandës si dhe ka shtruar një rrugë me të ardhurat e tij. Gjithashtu, mësohet se gjatë këtij viti ai është konfliktuar me disa persona në Sarandë për motive pronësie.
