Kryeministri Edi Rama ka uruar besimtarët myslimanë për muajin e Ramazanit duke theksuar se “Zoti u jep edhe atyre që nuk besojnë mundësinë e të kuptuarit të vlerës së paçmueshme të vetëpërmbajtjes”.
Në një postim në rrjetet sociale, kreu i qeverisë ka publikuar foto nga xhamia e re e Elbasanit teksa u uron besimtarëve muaj me agjërim të pranuar dhe lehtësim të bekuar “prej ndjesisë së të pasurit të Allahut pranë në krah”.
“Ajo çka Zoti u jep edhe atyre që nuk besojnë është mundësia e të kuptuarit të vlerës së paçmueshme të vetëpërmbajtjes dhe në këtë mbrëmje që sjell ditën e parë të hënës së re të Ramazanit, me këto pamje të Xhamisë së Re të Elbasanit, u uroj megjithë zemër e plot respekt ndjekësve myslimanë të kalendarit hënor të Islamit, një muaj me agjërim të pranuar e me lehtësim të bekuar prej ndjesisë së të pasurit të Allahut pranë në krah, falë vetëpërmbajtjes së këshilluar prej urtësisë qiellore”, shkruan Rama.
