Sot në orën 21:00 është finalja Europiane e Conference League. Roma-Feyenoord do të përballen në stadiumin ‘Air Albania’ në Tiranë duke e kthyer këtë ndeshje në një moment historik për historinë e futbollit shqiptar, pasi për herë të parë në vendin tonë luhet një finale europiane. Sot priten të vijnë mbi 70 mijë tifozë të tjerë, ndërsa mbrëmja e kaluar ishte e vështirë pasi pati incidente dhe tensione në të gjithë kryeqytetin.
Si pasojë e dhunës së ushtruar nga tifozët e të dy skuadrave, u plagosën 10 efektivë e 4 tifozë dhe u dëmtua një automjet policie. Në Spitalin e Traumës u paraqitën 30 të lënduar, nga të cilët 20 ishin policë. Pasi morën trajtim mjekësor, të gjithë dolën nga spitali.
Edhe bizneset janë bërë gati për të pritur numrin e madh të tifozëve që do të shohin finalen e Conference League në Tiranë. Përveç pikave të ngritura në pedonale, e gjithë rruga e Bllokut deri tek Tajvani ka 6 pika ku do të shiten birra, ushqime dhe pije të tjera.
Çmimet e birrave variojnë nga 3-4 euro, uji kushton 1 euro ndërsa sanduiçi kushton 2 euro. Edhe kioskat normale kanë shtuar furnizimit dhe nuk do të mbyllen as pas ndeshjes pasi do të punojnë me tre turne.
Shikoni fotot