Marco Van Basten, një nga sulmuesit më të mirë në futbollin botëror, por tmerrësisht i pafat pasi e mbylli karrierën shumë herët për shkak të dëmtimit, ka folur për France Football dhe ndër të tjera iu referua (sipas mendimit të tij) futbollistëve më të mirë në botë.
Dhe pikëpamjet e tij sigurisht që do të ngjallin shumë diskutime, jo vetëm për zgjedhjet e tij, por edhe për disa shpjegime që ai dha, veçanërisht për Lionel Messin dhe në radhë të dytë për Cristiano Ronaldon.
“Personalisht, mendoj se më të mirët në historinë e futbollit janë Pelé, Maradona, Cruyff. Si fëmijë, unë dukesha si Cruyff. Më vonë u bëra mik i tij dhe më mungon shumë. Pelé dhe Maradona ishin gjithashtu të pabesueshëm. “Ata kishin një nivel tjetër”, tha holandezi me karrierën e tij të madhe në Ajax dhe Milano, ndërsa i pyetur për Leo Messin është përgjigjur:
“Ai është gjithashtu një futbollist i madh por ka mungesë personaliteti. Messi nuk është ai që do të hyjë në një betejë, ndërsa Maradona ishte një tjetër personalitet, një lider i vërtetë”.
Megjithatë, duket se Messin e vendos në të njëjtin nivel me Cristiano-n siç tha pak më vonë: “Në diskutimin për top-lojtarët nuk harroj as Cristiano Ronaldon, as Platinin, as Zidanin”.
