Kryeministri Edi Rama ka reaguar pas barazimit 2-2 të Shqipërisë ndaj Kroacisë në Kampionantin Evropian, duke thënë se “kjo quhet krenari”.
Reagimi i tij erdhi përmes një postimi në Facebook, duke vendosur një foto të Qazim Laçi teksa shkruan se kombëtarja ishte përballë një skuadre të cilësuar më të fortë në letër e me më shumë eksperiencë në këto nivele, ama Shqipëria ishte e vendosur për t’ia dalë mbanë.
Reagimi i Ramës
KJO QUHET KRENARI
Përballë një skuadre shumë më të fortë në letër dhe me shumë më shumë eksperiencë në këto nivele ishte një Shqipëri e re, e përkushtuar me mish e me shpirt ndaj flamurit kuqezi, e cila të mbush me krenari, me dashuri, me respekt e me optimizëm për rrugën përpara, përtej këtij Europiani, falë djemve të jashtëzakonshëm dhe publikut të saj po aq të jashtëzakonshëm.
Kokën lart dhe kështu përpara, me pasion, shpirt skuadre, përpjekje deri në fund për të bërë më të mirën.
