Klaus Gjasula, i cili u fut dhe në historinë e Kampionatit Evropian për shkak të autogolit dhe golit të tij, ka mbajtur një prenoncim të shkurtër për mediat pas rikthimit të kombëtares kuqezi në Tiranë.
I pyetur se si ndihej për autogolin dhe golin e tij, Gjasula u shpreh se “vuajti” disa minuta prej gabimit që bëri, por shënimi në porten e kundërshtarit e bëri të ndihej shkëlqyeshëm.
“Besoj se jemi kënaqur të gjithë, që kemi bërë paraqitje shumë të mirë, e ndaj kemi prezantuar shtetin tonë shumë mirë besoj.
Ndjesia e autogolit s’ishte shumë e bukur, kam vuajtur disa minuta po më pas me golin ka qenë shkëlqyeshëm.
Çdo minutë që luajta, e shijova dhe provova të jap maksimumin.”, tha Klaus Gjasula.
Përsa i përket mendimit të tij për Shqipërinë në këtë evropian, Gjasula u shpreh se ndihet i lumtur pasi beson se bota e sheh vendin tonë me një sy ndryshe.
“Besoj se për Shqipërinë ka qenë një gjë shumë, shumë e mirë. Jam shumë i lumtur, se bota, besoj unë, na sheh me një sy ndryshe.”, tha lojëtari kuqezi.
Nuk harroi as të lavdëronte tifozët shqiptarë, të cilët ndezën atmosferën në Gjermani me ngjyrat, këngët dhe dashurinë e tyre për kombëtaren në Gjermani.
“Tifozët kanë qenë të mrekullueshëm, më të mirët në këtë evropian.”, e përmbyll Gjasula.