Ndarja nga jeta e autorit të njohur Ismail Kadare ishte një lajm tronditës për këdo. Personazhe publikë, artistë e politikanë ishin ndër të shumtët që reaguan për largimin e tij.Ndër ta nuk ka munguar as reperja Tayna e cila përmes disa rrjeshtave, zbuloi se ka një lidhje të veçantë me poetin e ndjerë.
Bëhet fjalë për emrin e saj të vërtetë, Doruntina.Përmes një story në Instagram, Tayna ka treguar se babi i saj i’a ka vendosur emrin duke u frymëzuar nga vepra e Kadaresë, “Kush e solli Doruntinën”.
Në statusin e saj ajo shkruan:
“Edhe kur kujtesa ime e lodhur ashtu si ato tramvajet e pasmesnatës. Vetëm në stacionet kryesore do ndalojë. Unë ty sdo të harroj”. Babi më quajti Doruntina nga vepra jote. Faleminderit për gjithçka që ke bërë për letërsinë shqipe. Prehu në paqe i madhi Ismail Kadare! Krijimet e tua nuk do të harrohen kurrë”.
Ismail Kadare mbylli sytë përfundimisht ditën e sotme, në Qendrën Spitalore Universitare “Nënë Tereza”. Shkrimtari lindi në Gjirokastër, më 28 janar të vitit 1936. Ishte akademik, politikan, ish-deputet i Kuvendit Popullor (1970-’82), zv/kryetar i Frontit Demokratik dhe një ndër shkrimtarët më të mëdhenj bashkëkohorë.
Si shkrimtar u shqua kryesisht për prozë, por kontributi i tij u shtri edhe në dramaturgji, poezi dhe përkthime. Nisi të shkruajë kur ishte ende i ri, fillimisht poezi, me të cilat u bë i njohur, e më pas edhe prozë, duke u bërë prozatori kryesor shqiptar.
Veprat e tij janë përkthyer në rreth 45 gjuhë të ndryshme, duke qenë kështu përfaqësues kryesor i letërsisë shqipe nëpër botë.
