Me tymuese dhe pankarta në duar ka nisur protesta studentore para Ministrisë së Arsimit. Studentët kanë hedhur tymuese dhe shishe në drejtim të godinës së ministrisë duke thyer disa xhama.
Në protestën e nisur sot prej orës 12:00 studentët i kërkojnë ministres Besa Shahini rrëzimin e ligjit për arsimin e lartë. Ata kanë hartuar një listë prej 14 kërkesash, ku i kanë kërkuar ministres që brenda 24 orësh të kthejë përgjigjie.
“Mund të themi se sot nuk është masive, por në ditët e tjera do të jetë dhe më masive. Ne nuk jemi kërcënuar dhe jemi këtu për kërkesat tona”, u shpreh një student.
Ndërkohë pak më parë kryeministri Edi Rama publikoi një video me të dhëna në rrjetin social “Facebook”, që sipas tij tregojnë se janë përmbushur të gjitha premtimet për studentët.