Në paketën fiskale të vitit 2022 qeveria kishte propozuar taksë 100 lek për 1 kg qumësht pluhur të importuar në vend, por pasi përfaqësuesit e kompanive të qumështit lobuan me qeverinë kjo taksë u hoq në projektligjin ‘Për taksat kombëtare’.
Përpunuesit e qumështit thonë se në këtë industri nuk lejohet të përdoret masivisht qumështi pluhur për produktet e bulmetit ndonëse në relacionin e paketës fiskale sasia e importuar e këtij produkti për vitin 2020 ka qenë në masën mbi 1.400 ton/vit, sasi kjo rreth 2.5 herë më e lartë krahasuar me atë të vitit 2016 që ka qenë rreth 560 ton/vit”.
“Janë 2 ligje që rregullojnë ushqimin në Republikën e Shqipërisë të cilat qartësisht e saktësojnë që për qumështin masiv, për atë që ne e quajmë kos, djathë të bardhë, djathë kaçkavall, salcë kosi dhe gjizë nuk përdoret qumështi pluhur, për produktet e tjera që nuk janë asnjë nga këto janë produkte qoftë në industrinë e prodhimit të ëmbëlsirave, akulloreve, çokollatës, mishit apo dhe bukës”, u shpreh Donjaldo Hoxha, sekretar i Përgjithshëm i Shoqatës “Industria e Përpunuesve të Qumështit”.
Industria e përpunimit të qumështit i ka kërkuar qeverisë rishikim të paketës fiskale 2022 duke i parashtruar edhe disa kërkesa të tjera.
“Normë e reduktuar TVSH në vlerën 6% për të gjitha produktet me origjinë shtazore.10 lekë subvencion për çdo litër qumësht lope/dele/dhi të dorëzuar nga fermeri në pikat e licencuara të grumbullimit ose fabrikat e përpunimit të qumështit. Heqja e akcizës 6 lekë/litër për gazin për industrinë e përpunimit të qumështit”, tha Donjaldo Hoxha.
Gjatë prezantimit të paketës fiskale në komisionin e ekonomisë një javë më parë Ministria e Financave tha se në Shqipëri futet çdo vit mbi 1 mijë ton qumësht pluhur, që përzihet me qumështin natyral dhe nënproduktet e tij.
“Ne nuk kemi kërkuar që të mos ketë taksë për qumështin pluhur ne kemi kërkuar nëse vihet taksë për një produkt që është lëndë e parë nuk mund të lësh pa taksë produktin e gatshëm fundor që është për konsumatorin asgjë më shumë, pra ne kemi thënë rregull në treg”, deklaroi Nikolin Jaka.
