Edi Rama refuzon të flasë për Dritan Zaganin në Zvicër, ish polici fitoi azil

Vizita e parë e një kryeministri shqiptar në Zvicër, për ironi të fatit, u krye në të njëjtën kohë që ish Shefi i Antidrogës në Fier dhe ish Drejtor i Kufirit në Vlorë, fitoi azil në këtë shtet. Bëhet fjalë për Dritan Zaganin, ish polici që zbuloi linjat e trafikut në Vlorë, ku dyshohet se u përdor edhe makina e ish Ministrit të Brendshëm, Saimir Tahiri.

“Një vizitë historike” e quajti Presidentja e Konfederatës së Zvicrës, Doris Lotard, gjatë konferencës së përbashkët për mediat.

Ndërkohë për Edi Ramën, gazetarët janë njësoj të padurueshëm edhe në Zvicër. Duke shpërfillur solemnitetin e ceremonialit, gazetarët e pyetën kryeministrin shqiptar për Dritan Zaganin.

Ishte gazetari i Le Temps, që e pyeti kryeministrin shqiptar se çfarë mendonte ai për vendimin që mori Zvicra për t’i dhënë azil ish policit shqiptar, i persekutuar në vendin e tij dhe nëse kjo çështje u diskutua mes Ramës dhe Lotard.

“Gazetarët janë të njëjtët, si në Zvicër, ashtu edhe në Shqipëri, kjo është fantastike” ishte përgjigja e Ramës që refuzoi të përgjigjet, shkruan Le Temps.

Kur mori fjalën, Lotard ishte më e qartë: “Unë mund t’ju them se ne folëm për ekzistencën e trafikut të drogës në Shqipëri. Unë krijova përshtypjen që qeveria shqiptare e merr shumë seriozisht problemin e korrupsionit dhe po bën ç’është e mundur për ta luftuar” tha ajo.

Mes të dyve u nënshkruan dy marrëveshje. Zvicra është mes shteteve kryesore që kontribuojnë me donacione në Shqipëri.