Brixhida Kokëdhima këshillon Monika Kryemadhin për “Zonjën e Parë”

Brixhida Kokëdhima në rrjetet e saj sociale ka postuar një koment duke analizuar pse Shqipërisë i duhet Zonja e Parë si institucion. Nëpërmjet shkrimit, bashkëshortja e ish-deputetit Koço Kokëdhima, ka thënë se është më mirë të promovohet figura e Zonjës së Parë përkrah Presidentit, sesa shpenzohen gjithë ato para për publicitetin e vendit.

Ky shkrim vjen si një këshillë për Monika Kryemadhin, e cila ditën e premte kur Meta u zgjodh President, u shpreh se Shqipëria nuk ka Zonjë të Parë dhe se do të vijonte punën e saj si deputete.

Statusi i plotë

Shqipëria duhet ta ketë institucion Zonjën e Parë! Shqipëria nuk e ka institucion Zonjën e Parë! A duhet ta kishte? Presidenti i Shqipërisë këto 3 vitet e fundit ka humbur kompetenca që më parë i ka pasur. Një President i dobësuar si institucion, siç është sot, e ka absolutisht të pajustifikuar Zonjën e Parë si institucion, me kompetenca, detyra dhe financime, megjithatë, unë mendoj që Zonja e Parë duhet të bëhet institucion për disa arsye:

Presidenti është simbol i bashkimit dhe unitetit të popullit. Në gjithë aktivitetin e tij, ai duhet ta përcjelli këtë vetë, përmes vendimmarrjes, shfaqjes publike, aktivitetit të tij dhe aktivitetit si çift.

Zonja është tepër e rëndësishme për një zotëri, qoftë ky Presidenti. Zonja është gjithmonë aty , pranë tij, rreth tij, një hap larg tij. Ajo duhet ta ndihmojë Atë të përcjellin së bashku frymën e bashkimit kombëtar, të respektojë çdo shqiptar, të fitojë zemrat e çdo shqiptari dhe të përcjelli butësinë, fisnikërinë, delikatesën, mirësinë dhe tharmin e bashkimit të familjes e kombit dhe këto nuk janë pak!

Sa harxhohen lekë për reklama, aktivitete shpesh pa impakt, le të harxhojmë pak para e ta ngremë këtë institucion që të kemi një President më të mirë, një familje presidenciale dhe një grua në shërbim të kombit!