Në Lezhë vetëm 14.5% e popullsisë së regjistruar ose 16 398 persona rezultojnë të kenë marrë të paktën njërën dozë të vaksinës anti covid dhe jo më shumë se 5% ose thënë ndryshe 5750 persona rezultojnë të ketë marrë dozat e plota të njërës nga 4 vaksinat e aplikuara në këtë njësi vendore.
Këto janë shifrat e konfirmuara nga Drejtoresha e Shëndetit Publik në Lezhë Zoje Zefi. Sipas saj, pas fazës së parë me çadrën në mes të sheshit dhe grumbullimet e shumta, tani ky proces po realizohet pranë qendrës sanitare ku kryhen edhe testimet e të dyshuarve për COVID.
Kjo shifër mbetet shumë e ulët pasi të shumtë janë ata që e kanë refuzuar vaksinimin pasi nuk u besojnë vaksinave kineze që kanë qenë më shumë të pranishme gjatë momentit të vaksinimit masiv.
Gjatë një dite kryhen rreth 90 vaksinime për moshat +60 dhe personelet e operatorëve turistikë në zonat bregdetare dhe nuk ka ndonjë pritshmëri për zgjerimin e hartës së qendrave shëndetësore ku mund të kryhet vaksinimi, pasi gjithçka është e lidhur ngushtë me numrin e dozave të vaksinës që vihet në dispozicion të Njësisë Vendore të Kujdesit Shëndetësor në Lezhë.
