Vllaznia i është bashkuar lëvizjes “More than Football” (Më shumë se futboll), ku shumë klube, si Benfika, Betis, Volvs, Southampton, Shakhtar Donetsk e të tjerë bëjnë pjesë.
Klubi shkodran përfaqësohet me kapitenin Bekim Balaj si ambasador.
Bomberi shkodran foli për vlerat që përfaqëson klubi dhe rëndësinë e madhe përtej fushës, që loja e bukur e futbollit ka në impaktin e shoqërisë. “Si kapiten i Vllaznisë, të luash në këtë skuadër është më shumë se futboll, sepse ti përfaqëson historinë dhe kulturën e qytetit.
Thjesht fakti që mund të bësh të lumtur gjithë qytetin dhe tifozët tanë, është momenti kur kupton se futbolli është më shumë se një lojë.
Nëpërmjet iniciativave si programet e komunikimeve me komunitetin, evente bamirëse dhe zhvillimin e bazës, futbolli kthehet në një mjet për promovimin e gjithpërfshirjes, diversitetit dhe mundësive.
Në esencë, futbolli është një forcë bashkuese, inspirimi dhe përforcimi, pasuron jetën dhe transformon komunitetet anë e mbanë botës. Futbolli na bashkon të gjithëve si një familje e madhe,” është shprehur Balaj.
PANORAMASPORT.AL
