Kryebashkiaku i Tiranës, Erion Veliaj ka mbërritur në Prokurorinë e Posaçme mëngjesin e sotëm rreth orës 09:00, gati 1 orë përpara orarit të caktuar.
Kryetari i Bashkisë Tiranë ka qënduar duke pritur i ulur tek vendi i policit në hyrje të SPAK, derisa është thirrur nga Prokurori.
Sipas gazetares Klodiana Lala, ai është thirrur nga prokurori i posaçëm Dritan Prenci, si person që ka dijeni në lidhje me inceneratorin e Tiranës.
Përpara se të futej në ambientet e Prokurorisë së Posaçme, kryebashkiaku Veliaj është përplasur me ish-deputetin e PD-së, Klevis Balliu që ndodhej përpara godinës.
“O hajdut”, iu drejtua Klevis Balliu, kryebashkiakut të Tiranës. Ndërsa Erion Veliaj iu përgjigj: “Thuaja Fahriut me 100 mijë euro makinë”.
Më pas, ai iu është drejtuar ambienteve të brendshme të Prokurorisë. Erion Veliaj kishte paralajmëruar vetë ditën e shtunë që do të paraqitej në SPAK.