Nuk ka zgjatur më shumë se një javë roli i Mirel Josës si drejtor sportiv i Prishtinës. Tekniku nga Tirana është emëruar sot trajner i skuadrës kryeqytetase të Kosovës duke u rikthyer të punojë në terren, aty ku ka njohur shumë suksese në futbollin shqiptar. Me vendim të drejtuesve të klubit, ish-trajneri tashmë, Arsim Thaqi, ka marrë vendin e Mirel Josës si drejtor sportiv.
Debutimi i 54-vjeçarit në Superligën e Kosovës do të jetë ditën e shtunë në transfertë përballë Gjilanit, shkruan Panorama Sport.
Njoftimi i Prishtinës
“Në koordinim me Bordin e klubit dhe shtabit profesional të përbërë nga trajnerët e klubit, është vendosur të bëhet rotacion në udhëheqjen e ekipit të parë. Duke përfillur kriteret e më hershme të kryetrajnerëve me përvojë dhe që pas vetes kanë shumë tituj të fituar, është vendosur që Mirel Josa tani e tutje të udhëheq ekipin e parë. Ndërsa, kryetrajneri i deritashëm Arsim Thaqi, i cili edhe para se të emërohej kryetrajner, kishte qenë koordinator i klubit dhe i shkollës, emërohet drejtor sportiv.
Sot pasdite skuadrën në seancën stërvitore do ta udhëheq Mirel Josa.
T’ju kujtojmë se Prishtinën në dy ndeshjet e ardhshme e presin ndeshje shumë të vështira. Të shtunën në Gjilan me skuadrën homonime, ndërsa të mërkurën Prishtina e “pret” Feronikelin vendas në Drenas.”
