Mesditën e së martës, një fuoristradë e zezë kalon në hyrje të Santa Marina në Ornos pak pas orës dy, duke ardhur nga aeroporti i Mykonos. Në pritje është bërë bujë pasi i ftuari i rangut të lartë që ata presin nuk është askush tjetër veçse ylli i Hollivudit, George Clooney, i cili përfundoi duke qëndruar në ishull vetëm për një ditë e disa orë.
Rezervimi nuk ishte në emrin e tij, por përdorej një pseudonim, ndërsa të gjithë punonjësit e hotelit që ishin rekrutuar për ta pritur, nënshkruan një marrëveshje konfidencialiteti.
Aktori i njohur, i cili thuhet se ka qëndruar në një nga nëntë vilat e resortit, pasi është sistemuar ka zbritur në mesditë për të ngrënë drekë në Buddha Bar, restoranti i famshëm që funksionon në hotel vitet e fundit.
Ai shoqërohej nga një shok dhe pavarësisht se ishin ulur aty ku i shihnin të gjithë, asnjë nga klientët nuk i shqetësoi dy meshkujt të cilët hëngrën dhe pushuan pak orë para festës në Lia, plazhi i zgjedhur nga Omega për të nisur linjën e saj të re të orëve, me dyqind të ftuar nga e gjithë bota, kryesisht gazetarë të revistave kryesore dhe influencues të fushës.
Lia nuk i ngjante aspak një plazhi të relaksuar, pasi të gjithë shezlongët dhe çadrat ishin hequr dhe mijëra fenerë ishin vendosur në rërë. Clooney ka qenë prej vitesh ambasador i kompanisë së njohur të orëve dhe mbërriti në kohë, i veshur me kostum blu dhe këmishë të bardhë. Ai ka biseduar me disa prej të ftuarve, ndërsa ka zhvilluar disa minuta bisedë me kryebashkiakun e Mykonos, një nga të paktët grekë që ka pasur fatin të marrë një ftesë për festë.
Pas përfundimit të mbrëmjes, Clooney u kthye në hotelin e tij për të pushuar pasi nisja e tij ishte planifikuar për sot. Tashmë nuk janë të paktë ata në ishull që besojnë se në një moment ai do të vijë për pushime në ishullin e erërave, ku qëndroi vetëm një ditë e disa orë, ndërsa era që lëshonte kombinohej me thjeshtësinë e tij dhe la përshtypjet më të mira.
