Policia kufitare ka ndaluar një 38-vjeçar në Han të Hotit, pasi ishte shpallur në kërkim për vrasjen e vëllait të tij.
Bëhet me dije se në pranga ka rënë shtetasi Mhill Shytani, pasi akuzohet për veprën penale “Vrasja për shkak të marrëdhënieve familjare, e kryer në bashkëpunim”.
38-vjeçari vrau vëllain e tij, Kujtim Shytani në vitin 2014.
Njoftimi i policisë:
Policia kufitare ndalon një person të shpallur në kërkim për vrasje.
Nga shërbimet e PKK Hani i Hotit, në vijim të punës për kapjen e personave në kërkim, gjatë kontrollit të imtësishëm në dalje të Republikës së Shqipërisë është ndaluar personi i shpallur në kërkim, shtetasi Mhill Shytani, 38 vjeç, banues në Shkodër.
Më datë 17.02.2020, Gjykata e Shkallës së Parë Shkodër i ka caktuar masën e sigurisë “Arrest në burg” në mungesë, për veprën penale “Vrasja për shkak të marrëdhënieve familjare, e kryer në bashkëpunim”, pasi në përfundim të hetimeve të bëra dhe në bazë të provave ligjore të siguruara, dyshohet se më datë 23.04.2014 ka vrarë vëllain e tij, shtetasin Kujtim Shytani, i cili në momentet e para është deklaruar nga familjarët si i vetëvarur.
Materialet iu referuan Prokurorisë së Rrethit Gjyqësor Shkodër, për veprime të mëtejshme.
