Qeveria e Maqedonisë së Veriut vendosi rihapjen e kufijve më 26 qershor. Për hyrjen në këtë shtet mësohet se nuk do të ketë asnjë kusht, as test për koronavirusin dhe as vetoizolim 14-ditor, siç ishte deri më tani.
Qeveria lehtësoi po ashtu edhe masa të tjera. Lejoi transportin e organizuar në rajonin e Pollogut, si dhe ka miratuar protokolle për hapjen dhe funksionimin e kazinove, e lojërave të fatit me aprate.
Gjithashtu është rikthyer gjendja e rregullt e transportit të organizuar të udhëtarëve nga dhe në zonën e komunës së Tetovës dhe nga komunat Tearcë, Bogovinjë, Zhelinë, Vrapçishtë, Gostivar, Jegunovcë, Bërvenicë, Mavrovë-Rostushë dhe qyteti i Shkupit.
Deri më tani numri totali i viktimave në vend ka arritur në 251, ndërsa numri i përgjithshëm i të infektuarve është 5311.
