Të drejtën e tyre për të votuar sot e kanë shfrytëzuar edhe banorët e Shtëpisë së Moshuarve në Prishtinë. Mësohet se Ekipi lëvizës i Komisionit Qendror të Zgjedhjeve (KQZ) është stacionuar në këtë institucion, ku të moshurit që prej mëngjesit kanë hedhur votën e tyre në kutitë e votimit.
Në shtëpinë e të moshuarve ndodhej edhe ushtruesi i detyrës së shefit të Shërbimit Social, Bahtije Ismaili, i cili bëri me dije se procesi i votimit në këtë institucion po shkon sipas të gjitha rregullave antiCOVID.
Ajo tha se aty do të votojnë 39 të moshuar, aq sa edhe ishin në listën e certifikuar.“Situata ka qenë shumë e mirë, shumë e qetë. Të drejtë vote kanë pasur 39 persona, në përjashtim dy ose tri që s’kanë dashur të votojnë. Të tjerët kanë votuar. Gjendja ka qenë e mirë. Ekipet mobile janë ende në institucion dhe gjithçka po shkon me rregull”, tha ajo.
