Prokuroria e Krimeve të Rënda ka përfunduar hetimet për Mikel Shallarin, i cili akuzohet se ekzekutoi ish-drejtorin e Policisë së Vlorës, Artan Cukun, më 8 prill të 2017-ës. Organi i akuzës i ka kërkuar gjykatës që Shallari t’i shpëtojë dënimit të përjetshëm dhe të ligjërohet si bashkëpunëtor i drejtësisë. Kjo, pasi 24-vjeçari ka pranuar vrasjen dhe ka treguar emrin e personit që e ka porositur. Sipas Shallarit, porositësi i vrasjes është Bledar Jambelli, një emër jo i panjohur për policinë. Kjo kërkesë për Mikel Shallarin do të shqyrtohet nga gjyqtarja Miliana Muça.
POROSITËSI
Emri i porositësit të vrasjes së ish-komisarit Artan Çuku u zbulua rreth një vit pas ekzekutimit të tij. Personi i cili kontraktoi Mikel Shallarin për ekzekutimin e Cukut, dyshohet të jetë 37-vjeçari Bledar Jambelli. Ai është shpallur në kërkim ndërkombëtar me vendim të Gjykatës për Krime të Rënda, e cila ka caktuar për të masën e arrestit me burg. Nga hetimet disamujore dhe provat e grumbulluara, grupi i hetimit ka dalë në konkluzionin se ish-drejtori i Policisë së Vlorës u vra për shkak të detyrës në radhët e uniformave blu. Nga hetimet rezulton se në dhjetor të 2012-ës, Artan Cuku e vuri në pranga fierakun Jambelli, pas dyshimeve se ishte autor i vrasjes së Armando Delajt në shtator të po të njëjtit vit. 38-vjeçari Jambelli rezulton një emër i njohur për policinë. Ai figuron më herët si i përfshirë në veprimtari kriminale. Ndaj tij u caktua edhe masa e arrestit me burg për vrasjen e Shpëtim Mukës, Ervin Shehut dhe plagosjen e Ervis Zanajt në nëntor të 2006-ës.
Ngjarja në fjalë dyshohej se kishte lidhje me një vrasje të ndodhur në Spanjë, që u pasua më pas me një zinxhir krimesh të rënda, që tronditën Vlorën e Tiranën. Pavarësisht, dyshimeve që rëndonin mbi të, Bledar Jambelli ia doli mbanë të rifitonte lirinë, por mesa duket konflikti i hapur me kryekomisarin vazhdonte. Sipas hetuesve, ai kontraktoi të dyshuarin Mikel Shallari për ekzekutimin e ish-drejtorin e Policisë së Vlorës. Hetuesit thonë se Shallarit i dha fillimisht shumën prej 3 mijë eurosh, ndërsa pjesën tjetër të pagesës do t’ia bënte kur të kishte kryer vrasjen, të cilën e realizoi prillin e vitit të kaluar në derën e pallatit ku banonte kryeko misari, në Rrugën e Kosovarëve në kryeqytet. Hetimet për çështjen në fjalë janë drejt finalizimit dhe pritet që në fund të majit dosja t’i dorëzohet gjykatës.