Organizata Botërore e Shëndetësisë (OBSH) të premten u bëri thirrje shteteve të pasura që të ngadalsojnë vaksinimin COVID-19 tek fëmijët e tyre me arsyen që një pjesë e vaksinave të dhurohet për vendet e varfëra, pasi viti i dytë i pandemisë mund të jetë shumë më vdekjeprurës.
Kreu i OBSH-së, Tedros Adhanom Ghebreyesus e konsideroi vaksinimin e fëmijëve në vendet e pasura si “katastrofë morale”, për shkak të mungesës së vaksinave anti-Covid-19 në vendet e varfëra.
Ghebreyesus theksoi se një pjesë e vogël e vendeve të pasura, të cilat siguruan pjesën më të madhe të vaksinave, tani po vaksinojnë grupe me rrezik relativisht të ulët.
Ai u kërkoi vendeve më të pasura të dhurojnë vaksinat e tyre për vendet që përballen me mungesa të mëdha vaksinash përpara se të nisin vaksinimin e fëmijëve, të cilët konsiderohen grupe me rrezikshmëri relativisht të ulët.
“Unë e kuptoj pse disa vende duan të vaksinojnë fëmijët dhe adoleshentët e tyre, por unë i nxis ata të rishikojnë vendimin dhe në vend të kësaj të dhurojnë vaksina për COVAX,” tha drejtori i përgjithshëm gjatë një konference për shtyp, duke iu referuar një iniciative të mbështetur nga OBSH për promovimin e barabartë për vaksinat kundër Covid.
Ghebreyesus tha se vetëm 0.3% e vaksinave kanë shkuar në vendet me të ardhura të ulëta pasi “një pjesë e vogël e vendeve të pasura të cilat kanë blerë shumicën e furnizimit me vaksina” tashmë kanë filluar vaksinimin e grupeve me rrezik më të ulët.
Vërejtjet e tij vijnë vetëm disa ditë pasi Qendrat Amerikane për Kontrollin dhe Parandalimin e Sëmundjeve rekomanduan që vaksina Pfizer kundër Covid-19 t’u jepet fëmijëve të moshës 12 vjeç.
Fëmijët mund të infektohen me koronavirus, por ka shumë më pak të ngjarë se të rriturit të shfaqin simptoma të rënda. Më pak se 2% e të gjitha rasteve që përfshijnë fëmijë në SHBA kanë rezultuar të shtruar në spital sipas të dhënave të mbledhura nga Akademia Amerikane e Pediatrisë.
