Një 39 vjeçar është arrestuar ditën e sotme nga policia e Krujës, pasi kishte kultivuar bimë narkotike në dy parcela në pyllin e fshatit Picrragë.
Rasti bëhet me dije nga uniformat blu, prej veprimtarisë së operacionit policor të koduar “Plant 2”, që ka për qëllim parandalimin dhe kultivimin e bimëve narkotike.
Pas verifikimeve në dy parcelat ku ai kishte mbjellur bimë kanabis, janë sekuestruar nën cilësinë e provës materiale 23 të tilla.
Çështja ka kaluar në Prokurorinë e Tiranës për veprime të mëtejshme.
Vepra penale “Kultivimi i bimëve narkotike”, neni 284 i Kodit Penal, është i dënueshëm nga 3 deri në 15 vite heqje lirie.
Njoftimi i policisë:
Krujë
Komisariati i Policisë Krujë, në vijim të punës për parandalimin e kultivimit të bimëve narkotike, bazuar dhe në inteligjencën policore, ka finalizuar operacionin e koduar “Plant 2”.
Si rezultat i tij u arrestua në flagrancë shtetasi D. S., 39 vjeç, banues në Krujë, për veprën penale “Kultivimi i bimëve narkotike”.
Ky shtetas, ka kultivuar bimë narkotike në dy parcela në pyllin e fshatit Picrragë, Krujë. Gjatë kontrollit në këto parcela, shërbimet e Policisë gjetën dhe sekuestruan, në cilësinë e provës materiale, 23 bimë të dyshuara narkotike kanabis.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
