Korabi ka vijuar dje përgatitjet, ku të pranishëm kanë qenë të gjithë lojtarët, madje edhe ata që nuk do të luajnë ndaj Kukësit. Skuadra dibrane vjen e sakatuar në përballjen e nesërme për sa i përket formacionit.
Në sfidën e radhës me Kukësin, stafi teknik nuk do të ketë të gatshëm të paktën katër lojtarë titullarë, pasi ata janë të pezulluar nga kartonët. Kështu, kapiteni Mziu dhe mesfushori Jubani u ndëshkuan me kartonë të kuq me Tiranën, ndërsa Elvis Prençi dhe Alfred Zefi kanë plotësuar numrin e tre të kartonëve të verdhë.
Më gjithë këto mungesa, trajnerëve Artion Poçi dhe Ermal Nexhipi u vështirësohet shumë puna për të bërë 11 veta në formacionin e ditës së hënë, pasi ata kanë një kontingjent mjaft “të cunguar” lojtarësh. Dihet që kohë më parë u përjashtuan katër futbollistë, ish-kapiteni Sheta, Vujadinoviç, Çela dhe Zguro.
I gjendur para kësaj situate kritike, Korabi është i detyruar që ndaj Kukësit të zbresë në fushë me një formacion, ku do të mbizotërojnë futbollistët e rinj.
Takimi i javës së 34-t mes Korabit dhe Kukësit do të zhvillohet nesër, në stadiumin “Elbasan Arena”, në orën 16:00. Korabi prej javësh ka zbritur në Kategorinë e Parë dhe sezonin po mundohet ta mbyllë me shumë sforcime.