Zëvëndëskryeministrja dhe Ministrja e Ndërtimit, Transportit dhe Infrastrukturës së Serbisë, Zorana Mihajlloviç, në një takim me drejtorët ekzekutivë të Bankës Botërore, theksoi se projektet për lidhjen me rajonin janë shumë të rëndësishme.
Mihajlloviç u shpreh se së shpejti do të përmbyllet Korridori 10, ndërsa në fokus është lidhja infrastrukturore që lidh Serbinë me rajonin – “Rruga e paqes” Nish-Merdare-Prishtinë, modernizimi i rrugës Beograd-Budapest.
Sipas njoftimit, përfaqësuesit e Bankës Botërore, të kryesuar nga Werner Gruber vlerësuan reformat e ndërmarra në Serbi, përpjekjet për krijimin e rrjeteve infrastrukturore me rajon dhe u interesuan për qëndrimin e Serbisë për lidhjen infrastrukturore me Shqipërinë.
Ministrja Mihajlloviç nënvizoi se “dy vjet më parë, për herë të parë në 30 vjet, është formuar një grup i përbashkët pune i përbërë nga ministrat e transportit të të dy vendeve që bashkërisht të punojnë në një projekt për të ndërtuar autostradën Nish-Merdare -Prishtinë”.